Doston aaj ham baat karne wale hain ek aisi jagah ke baare mein aur ek aise mandir ke baare mein jiske baare mein shayad aapne pehle bhi suna hoga. Is mandir se judi bahut si kahaniyan aur itihaas milte hain. Yahan ke pujari ji se baat karne ke baad is mandir ke baare mein kaafi rochak baatein pata chali. Aaj main wahi sab jankari aap sabhi ke saath share karne wala hoon. To chaliye bina time waste kiye is pavitra mandir ke baare mein jante hain.
Chamunda Kali Mandir ke baare mein
Doston main baat kar raha hoon Assam ke Hojai district mein sthit ek prachin aur mayavi mandir ke baare mein. Yeh mandir Devi Maa ko samarpit hai jahan Maa Chamunda Kali ki pooja ki jati hai. Yeh mandir Kapali nadi ke kinare sthit hai aur is jagah ko Naobhanga Kali Mandir ya Chamunda Kali Mandir ke naam se jana jata hai.
Yeh mandir bahut hi purana mana jata hai. Kaha jata hai ki is mandir ka nirman hamare purvajon ne kiya tha aur aaj bhi yeh mandir apne purane roop mein hi sthit hai. Mandir ke andar jo murti sthapit hai woh pathar ki bani hui hai aur har din yahan log Maa ki pooja aur darshan karne aate hain.Yahan ke logon ka maanna hai ki jo bhi bhakt sacche dil se Maa Chamunda Kali se apni manokamna mangta hai, uski ichchha zarur poori hoti hai. Isi wajah se bahut se log apni manokamna poori hone ke baad dobara mandir aakar Maa ka dhanyavaad bhi karte hain.
Amavasya ke din hoti hai vishesh pooja
Is mandir mein sabse adhik bheed Amavasya ke din dekhne ko milti hai. Amavasya ki raat ko yahan vishesh pooja ka ayojan kiya jata hai. Raat ke lagbhag 12 baje ke baad pooja shuru hoti hai aur poori raat bhakt log Maa Kali ki bhakti mein lage rehte hain.Is din aas-paas ke gaon aur Sharon ke alawa door-door se bhi log Maa Chamunda Kali ke darshan karne aate hain aur apni manokamna ke liye pooja karte hain.
Mandir se judi ek rochak kahani
Yahan ke pujari ji ke anusar purane samay mein jab bhi koi bada puja ya utsav hota tha, to bhakt log Maa Chamunda Kali ko chadhava mein sone ke gehne arpit karte the. Jaise kangan, chudi, kaan ke gehne, naak ke gehne aur anya sone se bane abhushan Maa ko chadhaye jate the.
Ek din kuch chor mandir se yeh sab sone ke gehne chura kar bhagne lage. Us samay nadi paar karne ke liye nauka ka istemal kiya jata tha. Chor log jab sone se bhara hua bag lekar nauka mein nadi paar karne lage tab achanak nauka nadi mein doob gayi.
Kaha jata hai ki chor aur sone se bhara hua bag dono hi Kapali nadi mein doob gaye aur aaj tak unhe dhundh kar nahi nikala ja saka. Isi ghatna ke baad is jagah ka naam Naobhanga pad gaya. Logon ka maanna hai ki Maa Chamunda Kali ki shakti ke karan hi chor apne bure irade mein safal nahi ho paye
Mandir tak kaise pahunche
Agar aap is pavitra mandir ke darshan karna chahte hain to sabse pehle aapko Assam ke pyare se shahar Hojai aana hoga. Hojai tak aap train, car, bike ya three wheeler ke madhyam se aasani se pahunch sakte hain.Hojai se Naobhanga Chamunda Kali Mandir ki doori lagbhag 8 kilometer hai. Yahan tak aap bike, car ya local transport se aasani se pahunch sakte hain.
Pooja karne ka best time
Maa Chamunda Kali ki pooja karne ka sabse shubh samay Amavasya ka din mana jata hai. Is din subah se lekar raat tak bhakt log pooja karwa sakte hain.Hojai aur aas-paas ke ilaakon ke log adhiktar Amavasya ke din hi Maa Chamunda Kali ke darshan karne aate hain.
Yahan ki ek aur parampara yeh bhi hai ki agar koi vyakti nayi bike, car ya scooty kharidta hai to sabse pehle use yahan laakar Maa Chamunda Kali ki pooja karwata hai. Logon ka vishwas hai ki isse unki gaadi aur safar dono surakshit aur shubh rehte hain.
Niskarsh
Naobhanga Chamunda Kali Mandir Hojai district ka ek prachin aur pavitra dharmik sthal hai. Yeh jagah sirf dharmik drishti se hi nahi balki apni rochak kahani aur itihaas ke liye bhi jani jati hai. Agar aap kabhi Assam ke Hojai district mein aate hain to ek baar Maa Chamunda Kali Mandir ke darshan zarur karein. Yahan ka shant vatavaran aur bhakti ka mahol har bhakt ko ek alag hi anubhav deta hai।
